Mätschbricht

Wemä dr erst Mätsch vo dr drittä Rundi het, bringt das gwüssi Vor- und Nachteilä, wobii mäh vor auem d’Nachteilä cha asprächä. Auso, nid nur d’Belüchtig vor Haue sondern ou d’Mannä und Frouä oder besser gseit, di heranwachsende u oft mit em Händy beschäftigte jungä Lüt, si chli am streikä, no nid ganz Wach oder schüschtegi Störigä.. Aber ou di aktuelli Form und Konzentrationsfähigkeit isch bi paarne Züriseeler nid optimau gsi, was sech i däm Spieu zimli grächt het.

D‘ Manne vo Zumikä und de Umligendä Gmeindä si eigentlech gar nid so schlächt gstartet, standesgmäss 1:0 i füehrig gange, ds Gscheh ufem geut gschlifnä Parket rächt im Griff gha u Stimmig isch ou guet bis sogar fasch chli öiforisch gsi. Da het plötzlech dr Schlendrian ids Spieu vo de Blauwiise izogä, blödi Bauverlüscht, fausch gstangä oder nid nöch gnue bim Gägner gsi, ja so het Chlotä-Dietlikä Jets A380 haut ou ds eintä oder angerä Gou gschossä. Zum Glück hei mir ou zwe Spiler i üsnä Reihä gha wo vor dr Chistä iischchaut si gsi. Am Schluss si sis bim Dävu 5 und bim Retu 3 Gou gsi, nid schlächt und dr Gi hiet ou no einä buechet! So isches es ständigs hin und här gsi, wobi d’Jets gäng öppe mit 1-2 Gou vore si gsi. Churz vor Schluss het Zürisee dr Speustang chönne uusglichä, nachdäm dr Ushieufscoutsch Gi d’Schrube azoge het und ab mitti 3. Drittu nur no mit 2 Liniä het la Spilä. Voilà Verlengerig, da het sich ds grosse Kader uszaut. Es isch du ömu nid lang gangä, nach däm Zürisee vor isch hartnäckig blibe het dr Bau nach em ne humorlose Dräischuss im Netz zablet. So hei d’Manne vo Zumike dä Extrapunkt ghout un d‘Partie schlussändlech verdient gwunnä.

© Copyright 2014 Zürisee Unihockey Zumikon Küsnacht Herrliberg • Impressum • Webpartner ONFLOW