Vom Spiäu gäg d'Mannä vo Wetzikä

Das isch wider mau e gueti Mätschvorbereitig vom Herre zwöi gsi, meh aus nün Fäudspiler, ou niemer wo fasch diräkt vor Olma oder schüsch vore Hundsverlochete iitrudlet. Dress u d’Bäu si ou da gsi, wenn ou ziimli ds spät, nume nid jufle u immerhin si si da. Gar nid pressant hets e Spiler usem Senioreförderkader gha, är isch äuä immer no ungerwägs. Jä nu, mir Gwinnä ou so 8:4!

Iz zum Spiäu, ds erstä Drittu isch relativ schnäu verzeut. D’Mannä vo Zumikä si gwiueut, ihres bekanntä Unihockey ufdszie und Wetzikä het gschickt verteidigt und mit es paar gfärleche Agriff ou guet dr gäge ha. Ir Pouse hets, eigentlech zu unrächt, vieu ds disskutierä gha. So vieu, dass Züerisee sich da e blödi 2 Minutästraf het igfahrä, doch das isch eher e Weckruef gsi für d Gielä vo Zumikä! Mit zwöi Distanzschüss het me plötzlech diä grösserä Spieuateilä ou i zwöi Gou chönne ummünzä u so isch meh verdient 2:0 vore gläge. Eigentlch het nüt für ne Wändi gsproche, Zürisee het hinge böimig verteidigt und im Agriff immer wider gueti Chance uf dr Cheuä gha. Doch Wetzikä het dr Usgliich doch no härebrösmelet, beidi Gou si sehr glücklech und komisch ds stang cho. Am Afang vom letzschtä Drittu isch das Spieu uf dr Kippi gstangä, Wetzikä het gspürt dass da no öppis chönnt ga und Züerisee isch e chli närvös wordä. Je lenger je meh, het sich zum Glück die spielerischei Klass düregsetzt u churz vor Schluss hets us em ne Gwüeu use ds 2:3 für Zürisee gä.

So isch dr lang ersehnti Siig im trochene gsi u dr Regischeik verdienter denn je!

© Copyright 2014 Zürisee Unihockey Zumikon Küsnacht Herrliberg • Impressum • Webpartner ONFLOW